მთავრობის აპარატი
ახალი ამბები
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, საბერძნეთში ვიზიტის ფარგლებში, ქართული დიასპორის წარმომადგენლებს შეხვდა. შეხვედრაში ქალაქ ათენში მცხოვრები, აფხაზეთიდან დევნილი, სხვადასხვა სფეროში მოღვაწე, ქართველი ემიგრანტები მონაწილეობდნენ.
გიორგი ჯინჭარაძემ, დიასპორის წარმომადგენლებს, ინფორმაცია მიაწოდა აფხაზეთის მთავრობის პროგრამებისა და სხვადასხვა მნიშვნელოვანი პროექტების შესახებ, რომლებიც ქვეყნის ფარგლებს გარეთ აფხაზეთის შესახებ ცნობიერების ამაღლებასა და ქართულ-აფხაზური კულტურის პოპულარიზაციას ემსახურება.
მთავრობის თავმჯდომარემ, ასევე, სამშვიდობო პროცესებში აფხაზეთიდან დევნილი ემიგრანტების ჩართულობის გაძლიერებაზე ისაუბრა.
შეხვედრა კითხვა-პასუხის რეჟიმში წარიმართა, სადაც მონაწილეებმა განიხილეს მნიშვნელოვანი საკითხები, რომლებიც ხელს შეუწყობს ქართულ დიასპორულ ორგანიზაციებთან ურთიერთობების გაღრმავებას, ერთობლივი ღონისძიებებისა და ქართულ-აფხაზური კულტურული შეხვედრების ორგანიზებას.
საქართველოს საელჩოში გამართულ შეხვედრას აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, აფხაზეთის მთავრობის აპარატის უფროსი გიორგი სუთიძე და საბერძნეთში საქართველოს საგანგებო და სრულუფლებიანი ელჩი ლევან ბერიძე ესწრებოდნენ.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე ქალაქ სტამბოლში მსოფლიო პატრიარქ ბართლომე I-ს შეხვდა.
შეხვედრაზე მსოფლიო პატრიარქმა საქართველოს ტერიტორიული მთლიანობისა და სუვერენიტეტის მიმართ მხარდაჭერა კიდევ ერთხელ დაადასტურა და კონფლიქტით დაზარალებულ მოსახლეობას მხარდაჭერა აღუთქვა.
საუბარი შეეხო, ასევე, აფხაზეთის ომით დაზარალებული მოსახლეობის ჰუმანიტარულ მდგომარეობასა და იძულებით გადაადგილებულ პირთა უფლებებს. მთავრობის თავმჯდომარემ ხაზი გაუსვა აფხაზეთის ტერიტორიაზე არსებული მართლმადიდებლური ტაძრების, მონასტრებისა და კულტურული მემკვიდრეობის დაცვის საკითხებს.
მთავრობის თავმჯდომარემ მსოფლიო პატრიარქს წლების განმავლობაში დევნილი ბავშვების მიმართ გამოჩენილი ყურადღებისა და მხარდაჭერისთვის მადლობა გადაუხადა. ასევე, მადლიერება გამოხატა კუნძულ ქინალიადაზე გამართულ საერთაშორისო საზაფხულო ბანაკში აფხაზეთიდან იძულებით გადაადგილებული ბავშვების მასპინძლობისთვის.
შეხვედრას აფხაზეთის ავტონომიური რესპუბლიკის მთავრობის აპარატის უფროსი გიორგი სუთიძე, საქართველოს გენერალური კონსული სტამბოლში ალექსანდრე ჯიშკარიანი და მსოფლიო საპატრიარქოს საყდრის არქიმანდრიტი და სტამბოლის ქართული სამრევლოს წინამძღვარი ილია ჯინჯოლავა ესწრებოდნენ.
აფხაზეთის მთავრობის ორგანიზებითა და მსოფლიო პატრიარქის მხარდაჭერით, საერთაშორისო საზაფხულო ბანაკი ყოველწლიურად იმართება.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე იძულებით გადაადგილებულ პირებთან აქტიურ კომუნიკაციასა და მათ წინაშე არსებული გამოწვევების შესწავლას განაგრძობს. მთავრობის თავმჯდომარემ დევნილ მოქალაქეებთან მორიგი შეხვედრა ქუთაისში გამართა.
შეხვედრაზე მოსახლეობამ აფხაზეთის მთავრობის თავმჯდომარეს უმთავრესი პრობლემები გააცნეს და კომპაქტურ ჩასახლებებში არსებულ ძირითად საჭიროებებზე ისაუბრეს.
გიორგი ჯინჭარაძის განცხადებით, დევნილი მოსახლეობის მხარდაჭერა აფხაზეთის მთავრობის უმთავრესი პრიორიტეტია, ხოლო მოქალაქეებთან პირდაპირი დიალოგი და მათი საჭიროებების სიღრმისეულად შესწავლა გადამწყვეტია პრობლემების სწრაფად გამოვლენისა და მათზე ეფექტიანი რეაგირებისთვის. შეხვედრებზე მიღებული ინფორმაციის საფუძველზე აფხაზეთის მთავრობა, თავისი უფლებამოსილების ფარგლებში, დროულ და ეფექტურ რეაგირებას განახორციელებს.
მთავრობის თავმჯდომარემ დევნილებს, ასევე, დეტალური ინფორმაცია მიაწოდა აფხაზეთის მთავრობის ერთიანი ელექტრონული პორტალის შესახებ, რომელიც ყველა უწყების პროგრამებსა და სერვისებს ერთიან ციფრულ სივრცეში აერთიანებს.
იძულებით გადაადგილებულ მოსახლეობასთან მსგავსი ფორმატის შეხვედრები, მთელი ქვეყნის მასშტაბით, მომავალშიც აქტიურად გაგრძელდება.
აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით, მარტვილისა და ხონის მუნიციპალიტეტებში მცხოვრები აფხაზეთიდან იძულებით გადაადგილებული პირებისთვის უფასო სამედიცინო გამოკვლევების აქცია გაიმართა.
ხონის მუნიციპალიტეტში აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე იმყოფებოდა, რომელიც გამოკვლევების მიმდინარეობას გაეცნო და ექიმებსა და დევნილ ბენეფიციარებს შეხვდა.
აქციის ფარგლებში, თბილისიდან მოწვეულმა მაღალკვალიფიციურმა ექიმმა-სპეციალისტებმა ბენეფიციარებს უფასო კონსულტაციები და საჭირო გამოკვლევები ჩაუტარეს, ასევე ექიმების დანიშნულების შესაბამისად, მათ ყველა საჭირო მედიკამენტი უფასოდ გადაეცათ.
მარტვილისა და ხონის მუნიციპალიტეტებში ჩატარებული სამედიცინო აქციის ფარგლებში, უფასო სამედიცინო მომსახურებით, ჯამში, 200-მდე ბენეფიციარმა ისარგებლა.
გამოკვლევების პროცესს აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრის პირველი მოადგილე მანონა გეჯუა, ხონის მუნიციპალიტეტის მერი ლადო ჯურხაძე, საკრებულოს თავმჯდომარე აკაკი გოფოძე, საკრებულოს თავმჯდომარის პირველი მოადგილე რეზო ბარაბაძე, საკრებულოს თავმჯდომარის მოადგილეები ბაჩანა ბასილაია და გუგა ბახტაძე ესწრებოდნენ.
აფხაზეთის ჯანმრთელობისა და სოციალური დაცვის სამინისტრო მსგავს სამედიცინო აქციებს, მთელი ქვეყნის მასშტაბით, ეტაპობრივად ახორციელებს და მისი მიზანია აფხაზეთიდან იძულებით გადაადგილებული მოსახლეობისთვის ხარისხიან სამედიცინო მომსახურებაზე ხელმისაწვდომობის გაზრდა, დაავადებების ადრეული გამოვლენა და მათი პრევენცია.
აფხაზეთის ავტონომიური რესპუბლიკის მინისტრთა საბჭოს თავმჯდომარესა და აფხაზეთის ავტონომიური რესპუბლიკის უმაღლესი საბჭოს პირველ თავმჯდომარეს დევნილობაში თამაზ ნადარეიშვილს დღეს 72 წელი შეუსრულდებოდა.
ამ თარიღთან დაკავშირებით, აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ, აფხაზეთის იუსტიციისა და სამოქალაქო ინტეგრაციის მინისტრ ალიონა ჩხოტუასთან და აფხაზეთის განათლებისა და კულტურის მინისტრ გიორგი ძაძამიასთან ერთად, თამაზ ნადარეიშვილის საფლავი ყვავილებით შეამკო და მის ხსოვნას პატივი მიაგო.
საფლავზე, ასევე, თამაზ ნადარეიშვილის ოჯახის წევრები იმყოფებოდნენ.
თამაზ ნადარეიშვილი დაჯილდოებულია ვახტანგ გორგასლის I ხარისხის ორდენით, იყო გიორგი შერვაშიძის სახელობის სახელმწიფო პრემიის ლაურეატი.
